Žejanski zvončari otpiraju zvona na Tri Kralji. Kako ča već znamo, prepoznatljivi su po svojemu klobuku( kumaraku) ki ima šarene trake ke padaju z klobuka do poda. Na vrhu su dve rože zgora fijokića, a se to simbolizira mlado leto. Na sebi imaju mornarsku majicu z dva bijela facola, bele brageše i črni postoli. Nose kožu (šubu) z dva dijela, jednu na pleći, a drugu oko pasa na koj su tri zvona. Žejanski zvončari zvone va paru, a zvonjava mora biti skladna i uhu ugodna aš tako nagovještaju dobro leto. Na Pust zvone po selu i pobiraju jaja i se ča njin ljudi daju. Završava na Pepelnicu kada se pali Pust.

„1981. LETA našlo se je slučajno par judi i počeli su pogovor. Se su to zvončari ki su do onda, a i potle nosili z Mučići, pa i z drugemi kad je rabilo. Korenšćani su počeli krcat Vlahovčani da nisu vredni prit z zvonci na Korensko i da ako se otprave da će jih pričekat z obedon. I tako je partilo. Rečemo za se: „Nimamo velu užancu, ma smo veseli i rado gremo!“ To su dve grupe ke se međusobno posjećuju sako leto, dok na ostalih gostovanjima nastupaju skupa. Na Lontošnju nedeju najdu se si ki su vredni zvonci nosit, muzika i maškare, pa parte z Vlahovega brega na Korensko i nazad na Vlahov breg. Taj se zvončarski pohod napravi i va suprotnen smjere. Ko ča vidimo, nose bele brageše, karirane košulje i krabujosnicu na koj su četire šibe. Na početku je maj ko i vavek!

Va Halubju, zapadnemu dijelu Kastavštine va okolici Rijeke sačuvani su jedinstveni narodni običaji - zvončari, a njihovo porijeklo seže do va prapovijest. Vezani za stočarske krajeve, ča vidimo na njihovoj opremi, prva njihova zadaća bila je tiranje zlih duhova zime i poticanje novega proljetnega ciklusa. Ogrnuti su z ovčju kožu i velikin zvonon na donjemu dijelu leđa. Na glavi imaju posebno stilizirane maske - čudne životinjske glave z crvenin isplaženim jezikon i z rogi. Obučeni su va bele brageše i mornarske majice kratkih rukava. Va ruki imaju baltu ili bačuku. U vreme maškar, bez obzira na vremenske neprilike, obahajaju u velikoj grupi sela svojega kraja prema davno utvrđenemu rasporedu. Za njih je vezana i legenda, tiranja Tatara ili Turaka. Kada su provaljivali va naše kraje, onda su se ondašnji pastiri ogrnuli z ovčju kožu, na glave stavili maske, stavili zvona, jako zijali i tako potirali neprijatelja. Zato je va njihovoj opremi i element oružja. Poznati su daleko izvan regionalnih granica. Ujedno su i najbolji čuvari folklornih tradicija, svog zavičajnog identiteta Halubja i Kastavštine.

Frlanski zvončari su zvončarska kompanija z Frlanije ka je osnovana 2003. leta kada su prvi put napravili svoje kolo i obašli sa mesta Frlanije, Rubeši i Matulji. Jedna su od najmlađih zvončarskih grupa z Matulj, a svoj kraj obahajaju po subotah (Frlanija – Rubeši – Trinajstići – Matulji – Frlanija) i to prvu subotu va drugin mesecu. Za vreme svog ophoda naprave po nekoliko kola na, za to, predviđenim mestima. Staru pusnu užancu va Frlanije obnovile su stare frlanske familije Lušijanovi, Kancileri, Matiškovi, Grabetovi, Mićetovi, Vicinovi, Turnićevi i zvončari od Matuj i Rubeš. Frlanski zvončari su obučeni va bele brageše i karirane košulje, imaju ovčju kožu oko vrata i pasa, tri zvona te facolić. Na glavi nose krabujosnicu- klobuk z rožicami od krep papira sakakovih boj. Na čelu grupe je maj, a va pratnji vesela pusna muzika. Za puste je va Frlaniji pravi pakal ki počne na Antonju i fini paljenjen pusta.

Mune imaju dugu tradiciju nošenja zvona. Na glavi nose klobuk z tri rože ke su napravljene od krep karte va raznih bojah, na vrhu su lepeze, a do nog se protežu šarene trake od karte. Oko pasa imaju tri zvonci, kožu, bele brageše, postoli i mornarsku majicu. Skupa z zvončari greju i ženske va narodneh nošnjah – kamižoti. Na Pust pobiraju jaja, pancetu, špeh, šoldi i ki ča da po Veleh i Maleh Munah i Žejanah. Zvonjava munskih zvončari je karakteristična aš vavik zvone va pare, pa se reče da zvončar mora imet dobar sluh da bi svoju zvonjavu uskladiv z zvončaron z kin je va paru. Za razliku od Žejanskih zvončari boću drže z vanjski strane. Munski zvončari imaju i kapota.

Pred oko 150 let Brgujci su šli prvi put zvonit. Na početku samo par njih, a onda se više i više, tako da jih je danas puno, a z njimi su i maškare. Brgujski zvončar obučen je va bele brageše z črljenu traku, crvenu košulju na kvadri i črne škornje. Na glavi nosi klobuk na kega su zašijene jelvice i na ke su stavljene rožice sake boje. Imaju kožu, 3 zvonca i baltu va ruki. Predzadnju nedilju pusta brgujski zvončari greju na tradicionalan pohod z Brguda do Zaluki preko Brešca, Mučići do Permani, Ružići i Stare pošte. Imaju specifičan način kako zvone, razlikuju se od drugih po hodu ki je gotovo plesni uz povremeno poskakivanje. A i rivaju se jače nego drugi zvončari! Poznat je njihov običaj da skaču preko škalini va Staroj Pošti, se onako oprćeni ča ni lahko. Upravo tako oni iskazuju svoju zvončarsku, mušku snagu i životni entuzijazam.

Na Zvonećoj govore da „zvonci nosit na Zvonećoj užanca je stara koliko i Zvoneća“. Jedni su od onih ki imaju najdužu kontinuiranu tradiciju i nje se čvrsto drže tako da oni obahajaju samo stare pute. Zvonećani na glavi nose cca 60 rožic napravljenih od šarenega krep papira. Nose mornarske majice, bele brageše, kožu i tri zvonca-dva manje i jedno veće. Osim malo manje od 40 –tak veleh zvončari, tu je i velkii pomladak kako vidimo iz priloženega. Tradicionalno na drugu nedeju pusta po užanci uzvraćaju posjet Rukavčanima.

N/A

Mučićevi zvončari na glave nose klobuk z rožicami i četiri žukvi z belimi mačići va cvatu. Klobuk je opleten z šparugu. Imaju mornarske majice i bele brageše. Na sebi nose ovčju kožu i tri zvona, va ruki baltu, na nogah črne škornji ili visoke postole. Oko vrata imaju ogrnjen zvončarski facol, a spreda obešen mići facolić za otrt pot. Ča se tiče njihovih obahajanja, tradicionalno 15 dan prvo pusne nedilje greju na Veli Brgud i delaju krug se nazad do Permani, a četrtak prvo tega naprave „Provu okol Ružić“ za novi i stari zvončari. Imaju tradicionalan pohod i na pusnu nedeju kada z njimi greju i njihove maškare. Kada greju veli i mići zvončari skupa, mići greju na početku grupe. Z zvončari gre okoli kapo i par judi z barilicami, ki skrbe da zvončari ne ostanu žedni. Va grupe gre oko 30 zvončari. Po dva redu va redu, a va prvin i zadnjin po tri. Najbolji zvončari su vavek na početke i na kraje grupe. Za sebe govore da ne hode po paradah i da se drže svojih puti i obahajanja po svojin kraju. Na taj način imaju poseban konktat z ljudi va mesti ka pasivaju.

Govore za sebe: „Mi smo jedni od najstarijih zvončari ovega kraja aš zvonci se po Bregeh nose već toliko let da niki ne zna kad je sve počelo. Od monturi na sebe nosimo tri zvonci, kožu od praza, bele brageše, stomanju na kvadri, va ruke baltu, na glave nosimo krabujosnicu, na koži visi facolić, na nogah imamo črne škornje. Vavek se nabere oko 20-30 zvončari, a s nami su još majista, muzika, judi ki nose barilce z vinun, a va sele još imamo črnega i jajari. Na pusni ponedeljak gremo po svojem sele noseć zvonci ča je tradicija i del naše domaće starini.“ Brežanski zvončari veruju da je zvončarska tradicija iznikla upravo na želje da se na taj način, zvonjavu i maškaranjen, „pokažu rogi“ uroki, odnosno semu onemu ča bi moglo naškodit blagu, ko se je na mlado leto selilo z mora na obronke Učke.